5. 4. 2023: Шефом КОТР Северовыход Словакії став Михал Ільканин
Ільканин довгы рокы діяв у русиньскій културі.
Як інфомровала Барбора Чехова з Крайской орґанізації турістічного руху (КОТР) Северовыход Словакії, 30-го марца 2023-го року одбыла ся вална громада орґанізації, котрой зряджовательом є Пряшівскый самосправный край. На нїй быв выбратый і новый председа, якый вычеряв Михала Сікору (на фотцї злїва).
Од 1-го апріля 2023-го року шефом КОТР Северовыход Словакії є Михал Ільканин (на фотцї справа). Того часу є і у функції предносты Окресного уряду в Свіднику, а так само є незалежным посланцём Пряшівского самосправного краю (ПСК). В попереднїм періодї быв і містьскым посланцём у Свіднику, но в остатнїх вольбах на тоту функцію не кандідовав.
Перед політічнов карьєров быв Михал Ільканин довгорічным членом драматічного колектіву Театру Александра Духновіча в Пряшові, обявив ся і у філмах, а публіка го могла знати і як модератора русиньскых подїй, наприклад і свідницького Фестівалу културы Русинів Словакії.
Мать мотівацію робити
Михал Сікора быв председом КОТР Северовыход Словакії од марца 2014-го року. По закінчіню мандату посланця ПСК вырїшыв наповно занимати ся роботов старосты села Штырба і турістічным рухом у Высокых Татрах.
Председа ПСК Мілан Маєрьскый подяковав Сікорови за скоро десять років роботы у функції і за довгорічны актівности про розвиток турістічного руху в Пряшівскім краю.
„У 2019-ім роцї до нас пришло 1,1 міліона навщівників, котры ся уквартелёвали, котры в краю схосновали різны службы, што має ефект на много областей жывота,“ повів Маєьркый, котрый припомянув, же в періодї шефованя Михала Сікоры ся подарило зреалізовати множество актівностей на пропаґацію краю.
„Мій попередник за 10 років зробив фалат доброй роботы. Положыв фундаменты і розумно вів фунґуючу орґанізацію, котра за тот період пришла з барз файныма ідеями, якы і зреалізовали ся. Зато маю о то векшу мотівацію робити, будовати на тых фундаментах так, жебы в области турістічного руху не рушала ся допереду лем КОТР, але вєдно цїлый край,“ повів нововыбратый председа орґанізації Михал Ільканин.
Новы візії і підпора авіатранспорту
Членове КОТР на валній громадї рїшыли і вопрос далшого розвитку турістічного руху в Пряшівскім краю.
„Важным інштрументом розвитку турістічного руху є і підпора авіатранспроту. Пряшівскый самосправный край хотїв бы ся веце анґажовати в тій темі, тїснїше і фокусовано сполупрацовати з Аеропортом Попрад-Татры. Цїль є одкрыти ся веце загранічу, звекшыти навщівность і доступность краю,“ повів жупан Маєрьскый.
Заанґажованы в турістічнім русї добісїдовали ся на выпрацованю візії і стратеґії тырвало утримательного розвитку турістічного руху в Пряшівскім краю.
Пряшівскый край є третїй найвеце навщівлёваный край Словакії. Меджі словацькыма турістами є другым найоблюбленїшым. У 2022-ім роцї ся в нїм уквартелёвало 888 970 навщівників. В поріваню з роком 2021 тото чісло наросло о 69 процент. Перед пандеміёв, у 2019-ім роцї, было тото чісло іщі высше, кедь в Пряшівскім краю уквартелёвало ся аж 1 108 000 турістів.
Петро МЕДВІДЬ, ЛЕМ. фм, языкова і ґрафічна управа: АРК в СР. Фото: www.severovychod.sk.
