5. 5. 2022: Уліця Александра Духновіча в Мукачові зістане

Як сьме інформовали у віторок, 4-го мая 2022-го року, в Мукачові на засїданю Комісії з вопросів сохранїня історічной дїдовизны, названя і переменованя уліць а встановлїня памятных знаків, мала рїшыти ся і пропозіція переменованя Уліцї Александра Духновіча.

Уліцю, котра є прямо в історічнім центрї міста, пропоновав посланець Мукачівской містьской рады за Всеукраїнське об’єднання «Батьківщина» переменовати на Уліцю Василя Турянчіка, по славнім фотбалістови.

Мукачівська містьска рада дементовала інформацію, котру сама пошырила на своїм офіціалнім вебсайтї, а так само на офіціалнім контї на сітї Facebook. Пост, котрый быв на соціалній сітї приданый, быв днесь пополудне оправленый, што відїти, кедь чоловік кликне, жебы відїв історію посту.

Рада вчера подала інформацію, же Уліця Александра Духновіча не была і не буде переменована. Переменованя мало быти пропоноване іщі на минувшім засїданю, але посланецькый корпус тото не підтримав. Рада так само звертать увагу на то, же переменованя уліць є выключна компетенція посланецького корпуцу, а не комісії.

Окрем того, Мукачівска містьска рада припомянула, же в Мукачові в рамках першой етапы дерусіфікації была переменована централна площа на честь Александра Духновіча.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.