5. 7. 2023: Лемковина в Вічным Місті!

Польскій Інститут в Римі што рока орґанізує фестіваль «Корзо Полонія», котрый є стрічом з польском культуром. Остатній ден тогорічной едициі фестівалю, 23. червця/юнія, посвяченый был Лемкам. Было то за справом промоциі антолоґіі лемківской поезиі «Ritorni – Powroty – Вертаня». Мож в ней найти творы пятьох русиньскых авторів тлумачены на італияньскій язык захопленом лемківском культуром Сільвійом Бруні.

Подія была нагодом, жебы пoзнати Лемковину заєдно без поезию, як і фотоґрафію тa музику. Нашу меншыну репрезентували: проф. Олена Дуць-Файфер, Дария Кузяк і Ольга Стариньска (на фото злїва).

Фестівальовый вечер зачал ся вернісажом выставы фотоґрафіі під наголовком «Lemki. Ritorni senza partenze» («Лемкы. Повороты без вынятку») авторства Сімоны Оттоленґі та Роберто Ґабрієле. Презентуваны артистами знимкы зроблены были на Лемковині. По обізріню выставы гості мали нагоду послухати бесіды Сільвіі Бруні з творцями. Вдяка тому дознали ся, же інспірацийом при селекциі знимок на выставу были лемківскы вершы находячы ся в антолоґіі.

Як наступна выступила проф. Олена Дуць-Файфер, котра приближыла Італиянцям історию і культуру Лемків. Оповіла тіж о антолоґіі і єй вартости. Стрічу закінчыл концерт Дариі Кузяк і Ольгы Стариньской, котры вказали лемківскы пісні во власных аранжациях, што лучыли фолькову музику з електроніком і сучасністю. За іх справом Італиянці могли почути тіж лемківску бесіду – дівчата прочытали пару вершів Петра Мурянкы і Владислава Грабана.

Італиянці доцінили і тепло приняли стараня нашых репрезентанток. Были щыро заінтересуваны Лемками. Видно тото было і в неофіцийній части по концерті – підходили, давали звіданя і ділили ся своіма рефлексиями. Можна повісти, же Лемковина певністю остане запамятана в Вічным Місті.

Премєра антолоґіі в Польщы одбыла ся в Палацу Потоцкых в Кракові та вчас Лемківской Творчой Осени, о чым веце писали сме гев, публикация презентувана была тіж в Старым Театрі в Кракові.

Дария КУЗЯК

(Публікуєме в оріґіналї – лемківскім варіантї русиньского языка.)