5. 8. 2022: Миколай КОНЕВАЛ: З русиньского сердця: Мої стишкы (2): Пастух, Што мам робити, Боже, При гробі Ісуса Хріста, Боже всемногучій
Миколай Коневал
Пастух
Уж єм куас підрос
не пасу за склепом гусята
так як дав Господь Бог
пасу коровы і телята
Статок я жену горї драгов
высше камінёлому під Комору
бо дружственици взяли
Вапене Кошары Вельку Гору
Помалы коло зерен пасучі
понад Чертежы ідеме
даколи і тихо співаючі
нашы коровы пасеме
Під Коморов пастусї
уж добру годину
паліцї кулбахы в руцї
бють штампулю або свиню
Коровы добрї напасены
нашы дома будуть барз рады
было хмарно курняк мы на клали
коровы ся не ґзили не тяли овады
Споминам на пасіня мило
на свої молоды рочкы
як на паствиску было весело
граня співаня красны співаночкы
Што мам робити Боже
Што мам робити Боже
кедь коло нас неправда...
што мам робити Боже
кедь всяды дїє ся кривда
Што мам робити Боже
кедь коло нас шырять ся блуды
што мам робити Боже
кедь коломутять чісты воды
Што мам робити Боже
кедь лож давають за правду
што мам робити Боже
кедь бурян садять як росаду
Што мам робити Боже
кедь перекручають історію
дай ты мі Боже силу
най не страчу в Тебе надїю
При гробі Ісуса Христа
Клячу Христе при твоїм гробі
твердо розмышлям о собі
о своїх грїхах што я зробив
котрыма я тебе образив
Смотрячі Боже в твої раны
думам якы маш зо мнов планы
добрї ты знаш я чоловік грїшный
бідный страпеный і нещастный
Всяды розосіяне підле насіня
і мене тягне до покушіня
я не раз у тім світї грїшу
обціяв я же ся полїпшу
Дай мі Господи силу волю
при твоїм гробі я ся молю
на колїна Христе на колїнах
за свої грїхы я мам страх
Одпусть Господи благам помож
силу не грїшыти до мене влож
Боже всемогучій
Боже будь нам покровитель
нашому народу краю
ты нам быв і єсь спаситель
ку тобі ся молю взываю
Боже Отчче всемогучій
всокоти наш святый обряд
посмоть на народ молячій
посмоть як люде тя просять
Не допусть Господи Боже
асімілацію мого роду
не допусть милый Боже
заник нашого обряду
Ісусе милый і ты мав
свого зрадного Юду
котрый тебе поцїловав
но я такый не буду
Боже знаш што ся стане
тобов сотвореным світї
ці народ ся перестане
ку тобі молити просити
Трим над нами свою руку
дай Боже добрых пастырів
бы зазеленіли твою святу луку
стадо піском задутой пустынї
