5. 9. 2019: 5. річник Русиньского фестівалу в Гуменнім

Вігорлатьскый музей в Гуменнім у спoлупртаці з партнерами орґанізує в днях 6-го аж 8-го септембра 2019-го року триднёвый проґрам 5-го річника Русиньского фестівалу із супроводным проґрамом.

Як інформовала Яна Федічова із Вігорлатьского музею, подія є частёв музейных підпорных акцій присвяченых дням европской културной дїдовизны. Головный музичный фестівал буде проходити 8-го септембра в природнім ареалї експозіції народной архітектуры і бываня – сканзенї Вігорлатьского музею в Гуменнім в часї од 15.30 до 18.00 год. 

 

Фестівал має і супроводны події

В рамках фестівалового проґраму будуть проходити і супроводны події заміряны на сохранїня, презентацію і підпору розвитку реґіоналных културных традіцій і сполупрацу при спознаваню европской културной дїдовизны.

Почас першого фестівалового дня буде проходити  на Пріватній умелецькій школї в Гуменнім вернісаж фотоґрафій з богатого діятельства фолклорных ансамблїв з реґіону. Пятніцёвый проґрам продовжує русиньско-чесько-словацькым фолклорным вечором.

В суботу буде проходити фестіваловый проґрам на Кременцї, верьху над селом Уліч, де стрїчають ся три граніцї – словацька, україньска і польска. Там по сполочнім выступі музикантів і співаків одбуде ся меджінародный концерт.

Проґрам в недїлю зачне торжественнов літурґіёв у Православній церькви св. Кіріла і Мефодія в Гуменнім. У недїльнім фестіваловім проґрамі на амфітеатрї ся представить сім співацькых ґруп і пятнадцять солістів з окресів Гуменне, Снина і Меджілабірцї. Детайлный проґрам можете прочітати на плаґатї.

Петро МЕДВІДЬ, ЛЕМ.фм