6. 10. 2022: На Дуклї припомянули собі Карпато-дукляньску операцію
Карпато-дукляньска операція припоминать нам днесь смілость і патріотізм нашых предків.
Жертвы Другой світовой войны з нагоды 78-ой рочніцї Карпато-дукляньской операції і Дня героїв Карпато-дукляньской операції собі у четверь, 6-го октобра 2022-го року, припомянули при памятнику на Дуклї.
Як інформовала аґентура TASR, участныма были представителї штатной справы, самосправы, як і участници протифашістічного одбоя, вєдно із шыроков масов людей.
Операція великого значіня
„Тота операція має величезне значіня. То найвекша протифашістічна гірьска операція почас Другой світовой войны. Значнов міров, вєдно із Словацькым народным повстанём, записала ся до історії цїлой Европы. Тото місце є припомінков нелем історічных дїй, але можностёв припомянути собі і то, што дїє ся на выход од нас,“ повів у приговорї державный секретарь Міністерства обраны Словацькой републікы Маріян Маєр.
За словами Михала Ільканина, предносты Окресного уряду в Свіднику, є слово мір днесь мало хосноване, і кедь є хосноване, та лем в теоретічній уровни.
Участным приговорив ся і директор Уряду екуменічной душпастырьской службы Озброєных сил Словацькой републікы Владимір Варґа, котрый ся з участныма помолив за героїв Карпато-дукляньской операції. Як повів, „нашы герої не роздумовали, а пожертвовали тото найцїннїше, што мали. Свою молодость, здоровя, а часто і жывот.“
На пєтній споминї были притомны і участници протифашістічного одбоя Анна Берґерова, капітан у выслужбі Владимір Стырмень, і поручік у выслужбі Бранїслав Тварожек.
По пєтній подїї на Дуклї собі дії, котры одбыли ся перед 78 роками, припомянули положінём вінцїв ку памятнику армадного ґенерала Людвіка Свободы і памятнику совєтьской армады Свіднику.
Дукля припоминать смілость і патріотізм
Подля презіденткы Словацькой републікы Зузаны Чапутовой Дукля припоминать нам днесь смілость і патріотізм нашых предків. Є сімболом, же каждый тоталітный режім скоріше або пізнїше підлягне незломній людьскій тузї по слободї.
„Споминаме з вдяков і пєтов на ослободителїв сперед 78 років. Єдночасно днесь, кедь недалеко нашых выходных граніць знова розгорів ся воєньскый конфлікт, собі знова із вшытков безодкладностёв усвідомлюєме, як величезнов цїнностёв суть мір, слобода і покійный жывот – і як легко тоты дїла можуть быти огрожены,“ сконштатовала презідентка.
Як додала, на Дуклю не забывать, хоць з причіны своёй участи на самітї презідентів в загранічу не могла тот рік брати участь на пєтных подїях. Карпато-дукляньску операцію означіла за єдну із найвызначнїшых і найдраматічнїшых в рамках Другой світовой войны.
„Вызначно помогла ку поражцї колаборантьского фашістічного режіму на Словакії, як і цїлковій поражцї нїмецького націзму в Европі.“
Карпато-дукляньска операція
Карпато-дукляньска операція была найвекшов і найкырвавішов битвов лінії выходного фронту, котра є повязана з теріторіёв днешньой Словакії.
Войска Червеной армії і Першого чехословацького армадного корпусу під веджінём ґенерала Людвіка Свободы почас нёй вели тверды бої з німецькым войском. Офензівна операція, котра мала споїти повстанецькы силы Словацького народного повстаня із совєтьскыма войсками, тырвала од 8-го септембра до 28-го октобра 1944-го року.
6-ый октобер є на Словакії День героїв Карпато-дукляньской операції, записаный в календарї як памятный день. Першый раз святковав ся у 2016-ім роцї.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Фото: FB/Марцела Іванчова.
