6. 12. 2021: Мірослав Жолобаніч: Захранка

(Выдаватель: Сполок русиньскых писателїв Словеньска, 2021, выдрукованя: GRAFOTLAČ PREŠOV, s. r. o., выданя: перше, тіраж: 300 фалатків, чісло сторінок: 88, ISBN: 978-80-89746-07-1,).

Позітівным фактом жывота сучасной русиньской літературы на Словеньску є нелем то, же Русины мають ґрупу стабілных і скушеных писателїв, котры творять і надале, але і то, же з часу на час ся стрїтиме з творчостёв нового автора, котра не є лем єдным выразным выстрїлом до тмы. За послїднї рокы бы-м меновав Людмілу Шандалову, котра ся выпрофіловала як писателька літературы про дїти і молодых, а єдночасно і Мірослава Жолобаніча, автора ёго найновшой выданой книжкы – Захранка.

Зоставителька ПгДр. Кветослава Копорова, ПгД.: о книжцї пише: „В русиньскім контекстї ся Міро Жолобаніч попри уж знамім карікатурістови Федорови Віцови стає далшым автором-гуморістом. По выданю семох книжок кресленого гумору (Bavme sa hokejom, 2013; Basketbal nás baví, 2014; IT vtipy a iné, 2015; Smiech náš každodenný/Сміх наш каждоденный, 2017; Хто ся сміє, є одважный, 2017; Хто ся сміє, є мудрый, 2018; Хто ся сміє, є здравый, 2019) ся так обявлює „нова тварь‟ кресленого гумору на русиньскій умелецькій сценї. Ай выданём своёй найновшой публікації – Захранка Міро зістає в темі гумору і сатіры, але мінить жанер і представлює ся чітателёви куртыма гуморесками, котры, як інакше, доповнює властныма карікатурами. Захранка – санїтка захранной службы приходить ід хворому ай до тых найоддаленїшых куртів републікы, жебы захранити тото найцїннїше – жывот чоловіка. Віриме, же Захранка Міра Жолобаніча в подобі девятнадцятёх куртых гуморесок стане ся сімболічно першов помочов в тых неблагых часах пандемії і приведе честованого чітателя к благородным і оптімістічным думкам, к лїпшому, надїйнїшому погляду на світ і жывот навколо нас.‟

Новій книжцї жычіме штонайвеце чітателїв і позітівных рецензій!

М. П.