6. 2. 2023: Земпліньска біліотека выставлює народностны книгы і часописы про дїти

Як інформує аґентура TASR, Земпліньска бібліотека в Требішові має про навщівників теперь приготовлену у своїх просторах выставу книжок і часописів про дїти і молодеж народностных меншын, котры жыють на Словакії під назвов #slovo#jazyk#kniha (#слово#язык#книга).

Бібліотекарька Маріянна Майхерова про аґентуру повіла, же выставу їм пожычів BIBIANA – Меджінародный дім уменя про дїти в Братїславі, і в требішовскій бібліотеці буде выстава приступна до 28-го фебруара 2023.

„Выстава представлює і вказує шырокій публіцї творчость і літературне богатство меншын, котры жыють на нашій теріторії і сохраняють собі свій материньскый язык, културу і народну ідентічность. Зато є природным, же народностны меншыны, котры жыють на Словакії, собі свій материньскый язык хранять як цїнну часть своёй ідентічности. Як дїдовизну предків, котру передавають далшій ґенерації,“ повіла Майхерова.

Окрем творчости тринадцятёх народностных меншын, котры офіціално суть увызнаны на Словакії, орґанізаторы выставы презентують і творчость вєтнамской меншыны, котра якраз теперь є в процесії вызнаня на Словакії.

„На выставі найдете образковы книжкы, повісти, книжкы про молодеж, приповідкы ці лепорела. І хоць суть писаны на різных языках, мають много сполочного,“ приближыла Майхерова з тым, же на дїти чекають і гры.

Выстава є збогачена і о книжкы з фонду бібліотекы BIBIANA.

Припоминаме, же минулый рік тоту саму выставу мож было відїти в Братїславі. Орґанізатором выставы з нагоды Меджінародного дня материньского языка, котрый святкуєме ся 21-го фебруара, і з нагоды Меджінародного дня книгы про дїти, як припоминаме собі 2-го апріля, быв BIBIANA – Меджінародный дім уменя про дїти.

Петро МЕДВІДЬ, ЛЕМ.фм. Ґрафічна і языкова коректура: АРК в СР.