6. 2. 2024: Горонь: „Меншыновый фонд зістане захованый‟

Окремый Фонд на підпору културы народностных меншын зістане захованый. Інформовав о тім в понедїлёк, 5-го фебруара 2024-го року, уповномоченый влады Словацькой републікы про народностны меншыны Акош Горонь на своїм офіціалнім профілї на сітї Facebook.

„Міністерка културы Мартіна Шімковічова на четверьговім засїданю влады (1-го фебруара, позн. ред.) зняла з леґіслатівного плану пропозіцію на злучіня фондів,“ написав уповномоченый.

Припоминаме, же словацька влада в децембрї минувшого року публіковала План леґіслатівных задач влады СР на рік 2024, в котрім ся раховало із злучінём Фонду на підпору културы народностных меншын із Фондом на підпору уменя, чім бы ся створив новый Фонд на підпору културы.

Проти того озвали ся представителї меншын, была списана громадна припомінка, а проти такого злучіня высловив ся і уповномоченый Акош Горонь.

„Почас мого куртого урядованя єм зреалізовав із дотуленыма дакілько стрїч, чого цїлём было скапчати силы про сохранїня фонду. Такой по новім році написав єм писмо панї міністерцї, высловив єм незгоду із злучінём фондів, а ініціовав єм голосованя меншынового выбору, в котрім меншыны узнесїнём одшмарили пропозіцію злучіня, і жадали зміну леґіслатівного плану,“ написав далше меншыновый уповномоченый.

„Наслїдно єм узнесїня передложыв і на Раду влады Словацькой републікы про людьскы права, народностны меншыны і родову рівность, котра стотожнила ся з голосованём выбору. Завершінём цїлого процесу была особна стрїча з міністерков културы у премєра, на котрій сьме ся добісїдовали на зрушіню той задачі,“ інформовав Горонь.

Уповномоченый влады Словацькой републікы подяковав вшыткым, котры підписали петіцію за захованя фонду, так само членам Выбору про народностны меншыы і етнічны ґрупы, але і председови партії Magyar Szövetség – Мадярьска аліанція, Крістіанови Форро, котрый подля Гороня одкрыв тоту тему на стрїчі з премєром.

Подяковав і представителям Міністерства културы Словацькой републікы „за конштруктівный діалоґ і выслуханя пожадавок меншын“.

„Продовжуєме в роботї і будеме сполупрацовати на новелізації закона так, жебы быв Фонд на підпору културы народностных меншын пружнїшый, і жебы робив про векшу спокійность народностных меншын. То задача, котра нас теперь чекать. КУЛТМІНОР-у теперь ‘грозить’ уж лем єдно дїло: буде мусити працовати ефектівнїше,“ закінчів уповномоченый Горонь.

Петро МЕДВІДЬ, ЛЕМ.фм, языкова і ґрафічна управа: АРК в СР.