6. 3. 2024: До Книгы рока ПСК мож голосити і русиньскы публікації

Як інформовало Оддїлїня комунікації Пряшівского самосправного краю (ПСК), крайска самосправа вєдно з Крайсков бібліотеков Павла Орсаґа Гвієздослава і реґіоналныма бібліотеками в Попрадї, Левочі, Воронові над Топлёв, Гуменнім, Свіднику, Бардеёві і Старій Любовнї выголосили 7-ый рочник чітательского конкурзу Книга рока ПСК.

Книгы, котры мож приголосити до конкурзу, мусять як звычайно мати повязаня з реґіонами ПСК, і то темов або особов автора текстовой ці образовой части.

„Крайскый чітательскый конкурз тїшыть ся піднимаючому інтересу, што нас барз тїшыть, бо в літературній творчости бізовно маєме ся чім похвалити,“ повів в повязаню із актуалным рочником конкурзу Книга рока ПСК 2023 Мілан Маєрьскый, пряшівскый жупан.

Конкурз подля нёго помагать пропаґації і підпорі выдаваня реґіоналной літературы, є єдночасно вдяка нёму веце відїти книжковы творы, котры суть скапчаны з Пряшівскым краём. „То про нас барз файна реклама, бо книжка є дашто, што навсе заховать ся про далшы ґенерації,“ повів председа ПСК Маєрьскый.

Чітателї з Пряшівского краю, але і зоставователї, редакторы, выдавателї, книгкупцї, дістрібуторы книжок ці бібліотекы а авторы можуть тіпы на тоту нагороду передкладати в пятёх катеґоріях. Конкретно іде о катеґорії Белетрія про дїти і молодеж, Белетрія про дорослых, Научна література і Популарно-научна література. Послїднёв катеґорійов, до котрой мож книжкы приголосити, є Україньска і русиньска література. Номіновати мож книгы, котры были выданы в роках 2022 і 2023.

Меджі номінації будуть зараджены выключно друкованы книгы – ґрафічно і книжково оброблены до вязаной або брожованой публікації, котра має придїлене ISBN. Передкладателї номінацій мусять два выдрукованы фалаткы доручіти особно до своїх реґіоналных бібліотек. Єдночасно мусять выповнити електронічный формуларь, котрый найдуть на офіціалнім сайтї ПСК.

Номінації спустили ся 4-го марца 2024-го року, а послїднїй день на поданя номінації є 30-ый апріль.

Як інформують орґанізаторы, номінації буде оцїнёвати одборна журі. В каждій катеґорії удїлить три місця. Так само передасть Премію публікы, о котрой переможцёви вырїшыть онлайн чітательска анкета. Тота бы мала проходити од 1-го юна до 31-го авґуста. Святочне удїлёваня нагород одбуде ся в септембрї 2024-го року.

Петро МЕДВІДЬ, ЛЕМ.фм