6. 4. 2024: Митрополіта Йона стрїтив ся з председом і посланцями ПСК

Як інформовав говорця Пряшівской архієпархії Михал Павлишиновіч, пряшівскый архієпіскоп і митрополіта Йона у четверь, 4-го апріля 2024-го року, стрїтив ся на Ґрекокатолицькім архієпіскопскім урядї в Пряшові з председом Пряшівского самосправного краю Міланом Маєрьскым і посланцями Заступительства Пряшівского самосправного краю, котры прияли ёго запрошіня.

„Гостї собі посмотрили просторы Архієпіскопского уряду і Постоянну експозіцію історії Пряшівской архієпархії. В Архієпіскопскій каплічцї святого Йосифа владыка Йона заспівав молитву – великодный тропарь Хрістос воскресе, і то з інтенціёв за вшыткых посланцїв, їх родины і посланя,“ інформовав Павлишиновіч.

Перед вечерёв у куртім приговорї кір Йона окрім іншого повів, же му приходить на думку слово із Єванегелія: „Учітелю – де перебываш?“ Зато є радый, же посланцї прияли ёго запрошіня і пришли на Архієпіскопскый уряд – до „дому“ пряшівскых єпіскопів, де жыли а дїяли і ёго попередникы.

„Радо схосную тоту нагоду з вами стрїтити ся і почати взаємно спознавати ся. Дякую за вашу роботу на благо жытелїв краю а надїям ся, же і далше буде сполупраца Ґрекокатолицькой церькви і Пряшівского самосправного краю розвивати ся.‟

Стрїча была, як інформовав Павлишиновіч, знаком і выражінём почливости односно представителїв Пряшівского краю, котрого теріторія є згодна з теріторійов Пряшівской архієпархії, з боку владыкы Йоны на початку ёго єпіскопской службы.

Петро МЕДВІДЬ, ЛЕМ.фм, языкова і ґрафічна управа: АРК в СР.