6. 5. 2023: Никыфор номінуваный до Найкрасшой Польской Книжкы 2022

Епіфан Дровняк, фурт бодай не найславнійшый во світі представник наівной шуткы, а певністю єден з найвыдатнійшых, незмінні інспірує. А інспірує ріжных творців і артистів, в тым авторів книжок. Дві з публикаций, котрых тема як раз посвячена є здібному Лемкови, нашли ся серед книжок номінуваных в конкурсі Найкрасшы Польскы Книжкы 2022.

Факт, што на поличках мож найти десяткы публикаций посвяченых артисті, не спричынят, што не являют новы. Лем по вписаню госла «Никыфор» в каталоґ Нацийональной Бібліотекы отримуєме під 300 результатів. Бібліоґрафія обнимат м.ін. ріжного рода опрацуваня, каталоґы, дописы, рецензиі, летушкы ци звуковы награня односячы ся до жытя і творчости Епіфана Дровняка. То лем вказує, же феномен Никыфора і пробы зрозумліня го, як артисты і чловека, дале ся утримуют.

По десятках років од розпознаня творчости Никыфора і уґрунтуваню ся його неповторного малярского стилю в істориі штукы дале хочеме іщы ліпше го познавати або познавати в інчых контекстах ци на розмаіты способы.

Никыфор – як з каталоґу

Нацийональный Етноґрафічный Музей в Варшаві долучыл до ґрупы тых, котры подля свойой концепциі рішыли запрезентувати чысленнійшій публиці творчіст Никыфора. І так в минулым році печатали близко тристастраницьовый альбом пн. «Маляр над малярями. Никыфор в колекциі Нацийонального

Етноґрафічного Музею в Варшаві». А сесе выдавницвто доцінило Польскє Товариство Выдавців Книжок, орґанізатор конкурсу Найкрасшы Польскы Книжкы 2022, поміщаючы публикацию серед номінуваных до нагорід і выріжнінь.

Ілюстрацийна част книжкы представлят 137 творів, єднак ілюстраций в каталоґу є веце. Выникат то головні з типового для Никыфора хоснуваня обох стран карткы, тектуркы ітп. Жебы підкрислити деталі дакотрых образів помістили в альбомі повекшыня тых елементів. Іде головні о сиґнатруры, печаткы, допискы автора.

Никыфор своі роботы малювал часто на тым, што впало му в рукы – окладинках, вырваных странах, інчых друках. Тот факт тіж находит оддзеркаліня в ілюстрацийным материялі. Роботы з презентуваной колекциі сут комплетні представляны, чытач може іх ґрунтовні проанализувати.

Окрем ілюстрацийной части в публикациі помістили і опрацуваня тыкаючы особы і феномену Никыфора та істориі возниканя збіркы його робіт триманой в Нацийональным Етноґрафічным Музею во Варшаві. Публикация є триязычна: по польскы, по украіньскы і по анґлицкы. Книжка была ефектом выставы «Никыфор. Маляр над малярями», яку в Музею презентували кінцьом 2021 і початком 2022 рока.

Никыфор – як з байкы

Жырі конкурсу на Найкрасшу Польску Книжку 2022 похылило ся і над інчом книжком, што посвячена малярьови. О кілько попередня нашла ся серед номінуваных в катеґориі «Штука і фотоґрафія (алюбомы і каталоґы)», о тілько тота друга – в катеґориі «Книжкы для діти і молодежы». Іде о публикацию пн. «Никыфор» авторства Мариі Стшелецкой, котру печатало Выдавництво Libra PL.

Не єст то перша номінация той публикациі в выдавничых конкурсах. В поясніню номінациі в плебісциті Локомотива (нон-профітова ініциятива книжковых блоґерів, промуюча вартістны книжкы для молодого поколіня) можеме прочытати такы слова в однесіню до книжкы: «Мария Стшелецка черговый раз і зас з великом вражливістю сігат до світа Лемків, тым разом оповідаючы біоґрафію Епіфана Дровняка – Никыфора. Нелегко написати дітям біоґрафію так, жебы было і ненудно і ясно. Гев текст єст акурат: прецизийный, багатый в емоцияі, але барз тактовный. З текстом спілпрацує авторска візуальна верства, котра крас доповідат і увражливлят недорослых на помішены репродукциі творів».

Кижка «Никыфор» як єдина з Польщы нашла ся серед стох выдавничых перлин The BRAW Amazing Bookshelf выріжненых через жырі конкурсу книжок зголошеных до Bologna Ragazzi 2023 @bolognachildrensbookfair.

Найкрасша Польска Книжка

Конкурс Найкрасша Польска Книжка орґанізуваный є Польскым Товариством Выдавців Книжок од веце як 60 років. Нагороджуваны і выріжняны в конкурсі публикациі каждого рока презентуваны сут на выставі Buchkunst International, што проходит вчас Медженародных Торгів Книжкы во Франкфурті. Публикациі берут участ тіж в інчых медженародных подіях, такых як нп. престіжный конкурс Best Book Design from all over the World в Лейпциґ. Початком того рока лавреаты послідніх років презентуваны были в Тайвані в рамках выставы «The Most Beautiful Polish Books» орґанізуваній в бібліотеці Not Just Library при Taiwan Design Museum.

До конкурсу мож зголошувати книжкы, што печатаны были през выдавців, котры свою сідибу мают в Польщы і были запроєктуваны через польскых твроців. Жырі оцінює выключні ґрафічный і едиторскій проєкт. Торжество вручаня нагорід і выріжнінь тогорічной едициі пройде 25. мая вчас Медженародных Торгів Книжок во Варшаві.

Наталія МАЛЕЦКА-НОВАК, ЛЕМ.фм.

(Публікуєме в оріґіналї – лемківскім варіантї русиньского языка.)