6. 6. 2023: У Войводинї проблемы з одкрытём русиньскых оддїлїнь в школах
Як інформує аґентура Рутенпрес, 1-го юна 2023-го року одбыло ся перше засїданя Одбору про освіту нового скликаня Націоналного совіту Русинів. Засїданя одбыло ся в просторах Заводу про културу Войводиньскых Русинів в Новім Садї.
На проґрамі засїданя было десять пунктів. Найважнїшов темов была інформація о записї школярїв до русиньскых оддїлїнь в школах. За актуалныма даныма в Коцурї суть записаны лем штирьми школярї до першой класы, в Дюрдёві пять, а в Руськім Керестурі 49 дїтей.
О рік може быти векша проблема
В повязаню з тым, же в Коцурї записаны суть лем штири дїти, буде треба найти іщі єдну дїтину, жебы одкрыти русиньске оддїлїня. Другов можностёв є написати жадость резортному секретаріяту і міністерству, жебы быв зробленый выняток, бо на одкрытя русиньского оддїлїня треба міннімално пять школярїв.
В Дюрдёві теперь сповнюють лем мінімалне чісло дїтей – пять. Рутенпрес звертать увагу, же о рік буде іщі векшй проблем в Коцурї, бо не є дітей.
Школярїв в русиньскім оддїлїню може мотівовати штіпендія. Родічі школяря, котрый учіть ся по русиньскы будуть діставати 5 000 дінарів на місяць, што є коло 42 евр. Но як відїти, ани штіпендія в нашых селах у Войводинї не пересвідчіла родічів, жебы записали веце дїтей до русиньского оддїлїня.
Проблемы і з выдаванём учебників
На засїданю членове обговорили і проблемы з выдаванём русиньскых учебників. Великым выдавательствам не оплатить ся друковати і выдавати малу тіраж, но в тім часі Русинам велику тіраж не є треба.
Так само выдаваня малой тіражі продовжує термін друкованя. Натеперь суть готовы лем учебникы материньского языка про першу класу, про далшы класы учебників не є. Проблем голосять і з выданём учебника музичной выховы.
„Хоць маєме мало школярїв, на засїданю ся підкреслило, же на недавных змаганях в знаню материньского языка здобыли ся вынятковы резултаты. На меджіокружнім змаганю брало участь 51 школярїв, на републіковім 22, з котрых перше місце заняло 15 школярїв, друге місце 6, а третє єден школярь“, пише Рутенпрес.
Як інформує аґентура, і тот рік в місяцї юл буде проходити лїтня школа про русиньскых школярїв, котра традічно робить ся на Словакії.
Петро МЕДВІДЬ, ЛЕМ.фм, языкова і ґрафічна управа: АРК в СР.
