7. 12. 2023: Одказ Олґы Прокоп жыє, свідчіть о тім далша выдана публікація

Хоць то вже понад три рокы, што попрощали сьме ся з Олґов Прокоп, яка безпохыбно належала меджі найвекшы душы русиньского културно-общественного жывота нелем на Підкарпатю, одказ, котрый по собі лишыла вдяка свому цїложывотному труду, жыє далше.

Лем в місяцї юл того року быв одпрезентованый 552-сторінковый зборник Русинські співанкы, котры Олґа Прокоп зберала цїлый свій жывот. В середу, 6-го децембра 2023-го року, предсееда Русиньского културолоґічного клубу Юрій Шиповіч інформовав, же з друку вышла далша публікація, котра є скапчана з плодным творчім жывотом нашой вызначной русиньской културной дїятелькы.

Приповідкы народів світа по русиньскы

„Днесь ся стало єпохалне дїйство – у выдавництві РІК-У вышла збірка Казкы з телевізора, в котрій позберано 80 приповідок народів світа, якы знама карпаторусиньска співачка Олґа Прокоп у 2019-ім роцї розповідала дїточкам в рамках телевізного проєкту Першого кабелного канала Вечірня казка,“ інформовав Шиповіч.

Як далше написав Юрій Шиповіч, ідея выдати книжку із приповідками на русиньскім языку не є нова. Іщі у 2019-ім роцї, коли Олґа Прокоп жыла, Володимір Біланин запропоновав выдати тоты приповідкы по русиньскы, а Станіслав Ганьковіч дав слово, же то профінанцує.

Зато по выданю в тім лїтї зборника Русинські співанкы быв зобраный колектів, котрый очолила внучка Олґы Прокоп – Наталія Симчик. В тім колектіві далше были Юрій Шиповіч, Анна Меґела, Станїслав Ганьковіч і Іван Архій, якый зробив обалку публікації. Якраз тота ґрупа людей пририхтовала нове выданя котре має повну назву Казкы з телевізора. Зобрані й ушорині Олґов Прокоп.

У книжці як ілустрації до окремых приповідок, суть схоснованы творы маленькых Чинадіёвцїв, бо Чинадіёво є повязане із жывотом а творчостёв Олґы Прокоп.

„Приповідкы записаны і упорядкованы прощенов бы Олґов Кіріловнов, нелем вчать дїточок родному слову, а і научать їх быти честныма, порядныма, благыма,“ пише ся в новій публікації.

Книжка вышла за повной фінанчной підпоры Станіслава Ганьковіча із Русиньского културолоґічного клубу.

Олґа Прокоп

Олґа Прокоп (6-го септембра 1940 р. – 3-го септембра 2020 р.) за свою довгорочну роботу про розвиток русиньской културы была оцїнена, кедь стала лавреатков Премії імени Василя Турока-Гетеша од Світовой рады Русинів, і лавреатков Премії Антонія Годинкы. Так само была нагороджена званём Заслуженый културный робітник Україны.

Із своїма ансамблями выступала на майже тісяч концертах. Окрім авдіо награнь выдала три фолклорны співанковы зборникы – Ластовочко, де-сь была? (р. 2015), Летїла бы-м на край світа (р. 2017) Русинські співанкы (р. 2020, то лем часть співанок, котры пак были комплетно выданы в тім роцї).

Петро МЕДВІДЬ, ЛЕМ.фм, языкова і ґрафічна управа: АРК в СР.