7. 3. 2023: Медженародный Ден Материньского Языка на Підкарпатскій Руси

Закарпатскє Областне Науково-Культуролоґічне Товариство ім. Александра Духновича разом з Русиньскым Культуролоґічным Клюбом зрыхтували презентацию «Альманаху днешньой підкарпатской русиньской літературы 2022 рік». Подія одбыла ся 25. лютого/фебруара в Центрі Культуры Нацийональных Меншын Закарпатя в Ужгороді в рамках святкуваня Медженародного Дня Материньского Языка. В презентуваній публикациі єст не лем поезия, але тіж проза, додатково тлумачыня 19 авторів з Украіны, Мадяр, Чех і Італиі. Альманах присвяченый єст 128. окремій гірско-штурмовій Закарпатскій Бриґаді, воякы котрой боронят державу, в котрій жыют. В часі стрічы дискутуваны были і пляны на найблизшый час, м.ін. святкуваня 100. річниці істнуваня Общества імени Александра Духновича циі 220. річниця народжыня будителя.

Карпатскы локальны ініциятивы»

1. марця рушат набір внесків до конкурсу «Карпатскы локальны ініциятивы» орґанізуваного Стоваришыньом Pro Carpathia. Цілю конкурсу єст заінтересувати та заанґажувати молоды орґанізациі і неформальны ґрупы через реализацию проєктів звязаных з культуровом і природничом спадковином карпатского реґіону. До конкурсу мож зголошувати проєкты, котры тыкают підтримуваня традиций, розвитку нацийональной і громадяньской свідомости, анґажуваня жытелів державы до спільной реализациі та промуваня проеколоґічного думаня. Што важне – шансы на дофінансуваня мают лем тоты проєкты, в котрых в реализациі задач окрем внескуючого бере участ што найменше єдна додаткова орґанізация, в тым волонтерска. Додатково преміюваны будут внескы, котры берут до увагы спілпрацу з локальныма самоурядами ци публичныма інституциями, та проєкты, головном темом котрых єст Шляк Волошской Культуры. Пуля дотациі то аж 350 тис. зл, котра допоможе в реализациі 35 карпатскых ініциятив. Внескы мож складат цілый марец.

Мушына ставлят на туристику

Нова тиристична атракция в Мушыні – ґондольова колейка на гору Мальник. Ідея побудувати таку атракцию в Мушыні явила ся уж давно, тепер сут уж першы проєкты колейкы. Плянувана долгіст леніі то 1700 м. На трасі будут курсувати невеликы ґондолі. На вершку на туристів буде ждала наступна атракция, видокова вежа, з котрой мож буде обзерати словацкы Татры ци Креницку Яворину. Як поінформувал бургомайстер Мушыны – Ян Ґольба, актуальні тырвают працы звязаны з рыхтуванйом до будовы леніі. На інтернетовій стороні Уряду Міста Мушына мож видіти дві концепциі колейкы. Перша з них закладат будову обох стаций в стилю традицийного будівництва, якє мож обзерати в реґіоні Мушыны, в другій концепция має модерну форму.

Великодній Ярмак в Лоси

Музей Дворы Карвациянів і Ґладышів просит до участи в Лемківско-Погіряньскым Великоднім Ярмаку. Подія пройде в неділю 26. марця в Мазярскій Загороді в Лоси. Охочы выставці, ремісникы ци народны творці, котры хотят вказати своі творы, прошены сут скорше сконтактувати ся з Музейом.

Ольга ПЕЛЕХАЧ, ЛЕМ.фм.

(Публікуєме в оріґіналї – лемківскім варіантї русиньского языка.)