7. 3. 2024: «синьов країнов» / авторска стріча з Петром Медвідьом

«Петра Медвідя знам уж долгы рокы. Знам го як новинаря, драматурґа, сценаристу, автора театральных пєс і – вкінци – як актора» – бесідує Мариян Марко, директор ТАД в Пряшові. Але то не конец обшыри, в якых реализує ся наш редакцийный колеґа. Запрашаме познати ближе Петера Медвідя поету на авторскій стрічы посвяченій його дебютантскій збірці «синьов країнов», яка одбуде ся 16. марця тр. о 17.00 год. в Рускій Бурсі в Ґорлицях.

«Кєд ся мі якісый час тому достала до рук книжочка – збірка вершів – был єм мило заскоченый. Познал єм дальшого Петра – Петра поету. Поету з великого П. Збірку єм перечытал, мож повісти, на єдным дыху» – оповідат Мариян Марко.

Авторска стріча буде нагодом познати ближе варштат, інспірациі, таємниці писаня. Буде то незвычайна бесіда, бо єй модератором буде інчый поета, туз лемківской поезиі – Петро Мурянка. Промоцийній стрічы товаришыла буде выстава монотипіі авторства Юрія Червеного, при участи іх автора. Презентуваны будут ґрафікы, што становлят нерозорвальну част змісту публикациі «синьов країнов».

«Петровы вершы выкликали во мі міцны емоциі. Словами ся філіґрантскы пограват, малює нима абстрактны образы, котры аж барз точно проникают до глубины душы. Великій духовный розмір вершів дає можливіст – нутит чловека задумати ся над свойом властном еґзистенцийом: минулістю – сучасністю – будучністю» – ділит ся вражынями директор ТАД. «Книжку синьов країнов ся хоче чытати фурт дале і дале» – констатує Мариян Марко. «Тішу ся на дальшу збірку поезиі Петра Медвідя».

Наталія МАЛЕЦКА-НОВАК,  ЛЕМ.фм.

(Публікуєме в оріґіналї – лемківскім варіантї русиньского языка.)