8. 2. 2022: Стара Любовня приготовлює біціґлёву стежку аж до Орябины

Ціклостежка до Гнієздного стала популарнов.

Сіть біціґлёвых стежок в Старій Любовнї поступно розшырює ся. Як інформує аґентура TASR, по тім, што є окресне місто споєне із сусїднїма селами Гнієздне і Хмельніця, тамтешня радніця приготовлює далшы трасы.

Місто Стара Любовня на своїм вебсайтї інформовало, же влони подарило ся докінчіти ціклостежку в містї, котрой прямым продовжінём бы мала быти траса аж до Новой Любовнї з напоїнём на уж існуючу біціґлёву стежку до Любовняньскых Купелїв. Но Стара Любовня бы мала мати біціґлёву трасу і до русиньской Орябины.

„В сполупраці із селом Орябина, котре здобыло фінанції із Вызвы про реґіон Пряшівского самосправного краю на проєктову документацію ціклостежкы Стара Любовня – Орябина, зачали проєктовы роботы на тій трасї,“ інформує самосправа з тым, же зачаток стежкы бы мав быти при вступі до Старой Любовнї од Попраду.

Траса довга нецїлы три кілометры пак продовжує тополёвов алеёв ку Мултімодалній станіцї в селї Орябина, котра є близко Орябиньского перелому. Орябиньскый перелом є Храненов природнов резерваціёв, котра находить ся у выходных Полонинах, і є інтересным турістічным місцём з канёном.

Місто має з ціклостежками до сел добры скушености. Як інфомровало, траса Стара Любовня – Гнієзнде стала барз популарнов і є хоснована вшыткыма ґенераціями людей. На уж існуючіх ціклостежках приготовлює далшы вылїпшіня і розшырїня, місто рахує і з выбудованём скейтпарку ці пумптраку про біціґлістів.

Петро МЕДВІДЬ, Лем.фм. Ґрафічна і языкова управа: ред. АРК в СР. Жрідло фотоґрафії: Manfred Antranias Zimmer/Pixabay.