8. 2. 2023: Світовый конґрес Русинів має одбыти ся в другій половинї авґуста

17-ый Світовый конґрес Русинів (СКР) бы мав проходити в днях 17-го аж 19-го авґуста 2023-го року в сербскім Новім Садї. Як інформовала аґентура Рутенпрес, адміністратівне оддїлїня общества Руска матка, котре тот рік конґрес орґанізує, о тім вырїшыло на своїм засїданю в пятніцю 3-го фебруара.

На робочій стрїчі, котру вів председа общества Руска матка, членьской орґанізації СКР за Сербію, Михайло Фейса, быв обговореный проґрам конґресу, котрый буде святочно одкрытый у фоає Сербского народного театру в Новім Садї выставов і културным проґрамом.

Другый і третїй день конґресу, в рамках котрых будуть проходити пленарны засїданя і засїданя конґресовых комісій, буде проходити на Філозофічній факултї Новосадьской універзіты. Фейса на стрїчі бісїдовав о тім, же мають замір выдати з конґресу науковый зборник і книжку абстрактів.

Наплановану дату проходжіня СКР іщі потвердять на кінцю фебруара, коли бы мало проходити і засїданя Світовой рады Русинів.

День скоріше в просторах общества Руска матка бісїдовав председа Фейса з директором Заводу про културу войводиньскых Русинів Сашом Сабадашом о фінанцованю СКР. Кедьже очекує ся коло 160 делеґатів і гостів, фінанцованя є найвекшов проблемов такой великой події.

Сабадош запропоновав Фейсови подати проєкт до конкурзу о фінанчны средства, котрый Завод про културу войводиньскых Русинів выпише в марцї.

Петро МЕДВІДЬ, ЛЕМ.фм. Ґрафічна і языкова коректура: АРК в СР.