8. 3. 2024: В Празї одбуде ся Русиньскый день

В історічній пражскій будові із 18-го столїтя, котра служыла лужыцькым Сербам як Сербска семінарія, а днесь має чеську назву Лужыцька семінарія, 20-го апріля 2024-го року одбуде ся Русиньскый день.

Інформує о тім найновіше выданя офіціалной ґазеты Общества приятелїв Підкарпатьской Руси – Podkarpatská Rus.

З ініціатівов зорґанізовати Русиньскый день пришло Общество приятелїв Лужыцї, з котрым Общество приятелїв Підкарпатьской Руси вже в минулости сполупрацовало. Лужыцько-сербска орґанізація, окрім іншых своїх актівностей, представлює і малы славяньскы народы, меджі якы рахують ся і лужыцькы Сербы, і котрых общество здружує.

„Довголїтнїй проєкт презентацій славяньскых етнік перервав COVID, а теперь їх знова обновлюють. Зачінають якраз русиньсков народностёв, зато нас представителї Общества приятелїв Лужыцї Онджей Шрамек і Елішка Обергелова ословили з просьбов о сполупрацу,“ пише Аґата Пілатова.

В проґрамі, котрый буде іщі публікованый на сайтї Общества приятелїв Підкарпатьской Руси, буде много інтересного. Мож буде выслухати рефераты реномованых історіків і културных діятелів із Чеськой републікы, Словакії і Підкарпатя. Так само приготовлює ся панелова діскусія, котра має быти на темы як історія Русинів і Підкарпатьской Руси, култура і література, русиньскый язык і ёго розвиток а кодіфікація, ці історія чехословацькой штатной справы за Першой републікы.

Пополудняйшы годины мають быти присвячены сучасности Русинів, русиньскым орґанізаціям в Чеській републіцї і у світї. Театер Viola з Пряшова одпрезентує сценічне пасмо Шепоты – історія русиньской співачкы Анці Ябуровой.

Орґанізаторы обіцяють і выступлїня русиньской музичной ґрупы ці русиньску кухню.

Інтересностёв є, же якраз будова Сербской семінарії в Празї у 1864-ім роцї была місцём, де лужыцько-сербскы штуденты основали общество з назвов Serbowku, што было перше славяньске штудентьске общество в Празї, котре пак мало вызначный вплив про културный розвиток лужыцькых Сербів.

Петро МЕДВІДЬ, ЛЕМ.фм, языкова і ґрафічна управа: АРК в СР.