8. 6. 2022: День Русинів Словакії одсвяткують в Бардеёві, але і в далшых містах

Проґрам буде богатый і на веце місцях.

Як інформовав председа Русиньской оброды на Словеньску (РОС), орґанізація і їй партнеры припомянуть собі День Русинів Словакії веце подїями в різных містах, де жыють Русины.

Глaвный проґрам тот рік одбуде ся в центрї історічного міста Бардейов, де в сполупраці з містом Бардеёв Русиньска оброда приготовила цїлонародны святкованя. Подія на Раднічнім намістю одбуде ся якраз в день, на котрый припадать День Русинів Словакії – 12-го юна 2022-го року.

Святкованя в Бардейові

Русиньске свято в Бардеёві зачне кроёванов процесіёв, котра піде од Містьской шпортовой салы до центра міста, де пак зачне културный проґрам.

В рамках културного проґраму выступлять русиньскы колектівы і солісты з реґіонів Снина, Меджілабірцї, Свідник, Бардеёв ці Стара Любовня. Подія буде завершена выступлїнём єдиного русиньского професіоналного ансамблю – Піддукляньского умелецького людового субору (ПУЛС).

Події і в Снинї а Меджілабірцях

День перед тым, в суботу 11-го юна, одбудуть ся події з нагоды Дня Русинів Словакії в Снинї і Меджілабірцях.

В Меджілабірцях місто вєдно з Містнов орґанізаційов РОС і далшыма партнерами приготовили так само богатый проґрам, котрый буде проходити на містнім амфітеатрї. Святкованя зачнуть перед Містьскым урядом, на амфітеатер пак так само перейдуть участници в рамках святочной кроёваной процесії.

В Снинї в тот самый день одбуде ся в рамках святковань Дня Русинів Словакії далшый концерт в рамках проєкту Русиньскы реґіоны в містї. Представлять ся в нїм перед сниньсков публіков Русины з бардеёвского окресу як Черговчан, Маріянна Железна ці дуо Шуркаловых.

Концерт приготовило і радіо

Ку святкованю Дня Русинів Словакії приєднало ся і тот рік Народностно-етнічне высыланя Радія і телевізії Словакії в Кошіцях. Радіо уж на 8-го юна приготовило у своїх просторах публічный концерт з назвов Марія Чокинова – голос, на котрый ся не забывать.

У великім радіовім штудію будуть выступати капела Файта і співачкы Марія Мамріллова, Наталія Падова і Михаела Василенкова. Модеровати буде знамый співак і редактор русиньского высыланя в радію Штефан Штець.

По двох роках Духновічів Пряшів

Уж традічно вєдно із святкованями Дня Русинів Словакії одбуде ся і Духновічів Пряшів. Тот цїлословацькый конкурз в декламації в русиньскім языку два рокы з причіны пандемії не одбыв ся. Но в понедїлёк, 13-го юна, в просторах Театру Александра Духновіча знова буде мож чути русиньске літературне слово в рамках уж 21-го рочника той події.

Як інформовав М. Караш, з той нагоды представителї русиньскых орґанізацій підуть і ку Памятнику Александра Духновіча, котрый є в Пряшові, жебы припомянути собі жывот і творчость найвекшого нашого будителя.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.