8. 6. 2023: Словакія офіціално узнала далшу народностну меншыну

Вєтнамска комуніта стала 14-ов офіціално вызнанов народностнов меншынов на Словакії. Удїлїня шатуту народностной меншыны схвалила влада Словацькой републікы почас свого засїданя в середу, 7-го юна 2023-го року.

Владный кабінет при своїм вырїшованю о тім дїлї выходив з рекомендації Рады влады Словацькой републікы про людьскы права, народностны меншыны і родову рівность, котра рекомендовала узнаня на основі одборной рекомендації Інштітуту етнолоґії і соціалной антрополоґії Словацькой академії наук.

Авторы того матеріалу признавають леґітімность і релевантность жадости вєтнамской комуніты. „Сповнює крітерії чісленности, на Словакії жыє уж майже 70 років, і в сучасности є етаблована третя ґенерація, котра є повно інтеґрована,“ пише ся в документї.

Кедьже на Словакії не єствує формална сістема офіціалного узнаня народностной меншыны, Вєтнамцї ся меджі офіціално узнаны народностны меншыны прияли узнесінём влады о тім, же їх представитель буде членом Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.

Подобный способ практіковав ся у 2010-ім роцї, коли были до ґрупы офіціално узнаных народностных меншын на Словакії прияты Сербы.

В остатнім списованю жытелїв із 2021-го року ся ку вєтнамскій народности на Словакії приголосило 2 793 людей, 489 собі єй дало як далшу народность.

Жадость на Міністерство справедливости Словацькой републікы адресовали і представителї ґуральской комуніты, котры бы так само хотїли быти узнаны за окрему народностну меншыну.

Хоць офіціално не были публікованы даны о тім, кілько людей приголосило ся ку Ґуралям у списованю з 2021-го року, за нашыма інформаціями то было коло 5000 людей.

Вєтнамска меншына прибыла ку 13-ём меншынам, котры были узнаны дотеперь, ку мадярьскій, ромскій, русиньскій, нїмецькій, російскій, сербскій, україньскій, булгарьскій, жыдївскій, моравскій, чеській, хорватьскій і польскій.

Петро МЕДВІДЬ, ЛЕМ.фм, языкова і ґрафічна управа: АРК в СР.