8. 7. 2022: Бардеёв і Свідник на лїто приготовили турістічны влакы

Почас лїта можуть турісты і домашнї в окресах Бардеёв і Свідник одвезти ся турістічныма влаками. Єден з них ходить на трасї Бардеёв – Бардеёвскы Купелї, другый ходить із Свідника до Долины смерти під Дуклёв.

Як інфомровав аґентуру TASR Радомір Янчошек, директор Областной орґанізації турістічного руху Шаріш – Бардеёв, бардеёвскый турістічный влак завезе людей ку найінтереснїшым і найнавщівлёванішым місцям Бардеёва і Бардеёвскых Купелїв.

„На будькотрій заставці можуть подорожуючі выступити, посмотрити собі красы історічного центра Бардеёва ці навщівити забавный парк, і пізнїше наступити на влак і подовжовати на дразї до Бардеёвскых Купелїв,“ повів Янчошек. Цїла драга влаком тримать приблизно годину, і денно влак ходить сімраз.

Куплены листкы суть цїлоденны, зато люде можуть выступити і наступити будьде. Почас путованя влаком вдяка авдіопродовникови дізнають ся множество інтересностей о сучасности і минулости Бардеёва і Бардеёвскых Купелїв.

„Заставок є девять, траса зачінать на Раднічнім намістю при скулптурї ката, в Бардеёвскых Купелях стоїть коло лїтнёго купалиска, сканзену і під колонадов,“ доповнив Янчошек.

Турістічный влак у Свіднику ходить каждый тыждень од середы до недїлї, аж до кінця лїта. Траса є Свідник – Долина смерти, і ходить трираз за день. На трасї є девять заставок. Почас путованя так само дістануть подорожуючі інформації о інтересностях реґіону. І Свідник продавать листкы на цїлый день, значіть і там мож выступити і наступити на далшый влак будьде.

 

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.