9. 1. 20120: Участь меншын на публічнім жывотї є подля уповномоченого основов ефектівной меншыновой політікы
Забезпечіня участи народностных меншын на публічнім жывотї є основов того, жебы было мож бісїдовати на Словакії о ефектівній меншыновій політіцї. В розоговорї про словацьку пресаґентуру SITA то повів уповномоченый влады Словацькой републікы про народностных меншыны Ласло Буковскый.
Одкликав ся притім на Лундьскы рекомендації, з котрых аплікаціёв Словакія і дві декады по їх приятю заоставать.
Треба конкретны крокы
Покля Словакія думать політічны декларації о тім, же меншыны представлюють богатство країны досправды, пак є подля Буковского шанса, жебы ся зробили конкретны крокы.
„Тоты основны рамкы Высокого комісаря Орґанізації про безпечность і сполупрацу в Европі про народностны меншыны в двох уровнях говорять о участи меншын на публічнім жывотї: при вырїшованях, наприклад, на владній уровни, у выборах, на реґіоналній і містній уровни, в порадных конзултачных орґанах, як і в самосправных формах,“ повів про аґентуру уповномоченый.
За ёго думками треба найти правилный способ аплікації тых рекомендацій. „Тадь у общіх основах документ конштатує, же ефектівна участь меншын на сполоченьскім жывотї є єднов із основных частей мірной і демократічной сполочности, зато мусять влады прияти в одношіню ку народностным меншынам шпеціфічны крокы, жебы їм уможнити сохранити властну ідентічность,“ акцентовав Буковскый.
Конкретну форму тых кроків видить уповномоченый в прикладах доброй практікы в загранічу. Подля Буковского не треба ніч нове выдумовати, Словакія може іншпіровати ся країнами околіцї, лем треба волю.
Лундьскы рекомендації
Лундьскы рекомендації, котры дотуляють ся ефектівной участи народностных меншын на публічнім жывотї, были прияты у 1999-ім роцї. Мають помагати окремым державам прияти такы крокы, котры бы змірнёвали існуючі напругы і помогли повнити задачу превенції конфліктів. Рекомендації належать меджі інштрументы такзваного мягкого bukправа в области охраны народностных меншын.
Петро МЕДВІДЬ, ЛЕМ.фм
