9. 1. 2019: Церьков у Новім Садї стала конкатедралов

7-го януара 2019-го року, на праздник Рождества Ісуса Хріста подля юліяньского календаря, выголосив владыка Ґеорґій (Джуджар), єпарха Ґрекокатолицькой єпархії св. Николая із центром у Руськім Керестурї на основі свого декрету Церьков св. апостолів Петра і Павла у Новім Садї за конкатедралный собор.

Церьков у Новім Садїі так стала першов по Катедралнім соборї св. Николая в Руськім Керестурї. Адміністрація єпархії, котра має на старости ґрекокатоликів у Сербії і Чорній Горї є якраз в Новім Садї, якый є і центром Войводиньской автономной области. Інформовала о тім аґентура Рутенпрес.

 

Мольме ся, жебы довіра до нас была оправдана

Єпарха підняв статус хараму почас архієрейской Божественной літурґії св. Василія Великого, котру з ним служыв у новій конкатедралї і новосадьскый парох Юліян Рац.

„Цїла Церьков, значіть і мы, святкуєме Рождество Хрістово, бо Бог послав Сына свого, жебы нас освободив од гріха, спасав і жебы сьме мали вічный жывот. Ісус приходить до нашых сердець, кедь го хочеме. І нам треба, жебы сьме собі заслужыли спасу і мір своїм жывотом,“ повів владыка почас проповідї на торжественнім богослужіню.

На кінцю літурґії містный парох подяковав владыкови Ґеорґіёви і апеловав на віруючіх молити ся, жебы довіра, котра была дана парохії декретом о выголошіню містного храму за конкатедралный собор, была оправдана.

 

Нова єпархія св. Николая

Єпархія св. Николая є новов єпархіёв, была выголошена лем 6-го децембра 2018-го року Папом римськым Франціском, котрый нову церьковну єдиніцю вытворив із бывшого Апостольского екзархату про ґрекокатоликів у Сербії і Чорній Горї.

Апстольскый екзархат выникнув у 2003-ім роцї, по роспадї Югославії, коли быв вынятый із Крижевацькой ґрекокатолицькой єпархії. Крижевацька єпархія до 2001-го року мала під собов вшыткых ґрекокатоликів на теріторіях бывшой Югославії.

Од 2013-го року змінила ся назва екзархату на Апостольскый екзархат у Сербії. Катедралным собором од 2003-го року є Церьков св. Николая в Руськім Керестурї, котрый є і головным центром войводиньскых Русинів. Єпархія має 21 парохій і коло 22 тісяч віруючіх. Вірниками новой єпархії суть главно Русины, но мож меджі нима найти і Хорватів ці Румунів.

Петро МЕДВІДЬ, ЛЕМ.фм, жрідло фотоґрафі: Рутенпрес, ilovenovisad.com.