9. 1. 2024: Засїдала редакчна колеґія журналу Отцюзнина

Як інформовав Юрій Шиповіч, председа Русиньского културолоґічного клубу і головный редактор културно-белетрістічного журнала Отцюзнина, 3-го януара 2024-го року в Центрї словацькой културы в Ужгородї одбыло ся засїданя редакчной колеґії журналу.

На засїданю брали участь і дописователї того періодікума Михаіл Зан – етнополітолоґ, доцент Катедры політолоґії і державного управлїня Ужгородьской націоналной універзіты (УжНУ), Володимір Феніч – кандідат історічных наук, доцент Катедры модерной історії Україны і загранічных країн УжНУ, і кандідат історічных наук Др. Павел Ленё – доцент Катедры археолоґії, етнолоґії і културолоґії УжНУ.

Участны обговорили роботу на третїм чїслї обновленого журнала і ёго обсяг. Як далше інформовав Шиповіч, Володимір Феніч запропоновав до журнала запровадити рубріку Вызнамні карпаторусины, і уж в споминанім третїм выданю в рамках ньой має приготовити статю о Юліёви Гаджеґови, карпаторусиньскім історікови, новинарёви, реліґійнім і културнім дїятелёви, од котрого народжіня 16-го януара того року мине 145 років.

„Кедьже Отцюзнина є журналом, котрый выходить раз на квартал, член редакчной колеґії Михаіл Куцкір запропоновав на задню сторінку часопису давати одповідный поры року (коли выходить чісло) пейзаж авторства єдного з вызначных карпаторусиньскых малярів,“ інформовав дале Юрій Шиповіч.

Журнал Отцюзнина выходить як кварталник із тіражом 500 фалатків. Обновити выданя нашого єдиного журналу на Підкарпатю подарило ся в роцї 2023 завдякы помочі професора Павла Роберта Маґочія, котрый про Русинів, якы на Українї не мають жадной підпоры, позганяв фінанції.

Журнал выходив уж в минулости, од 2016-го до 2018-го року, но через складны условія, котры Русины на Підкарпатю мають, ёго робота была перервана.

Петро МЕДВІДЬ, ЛЕМ.фм, языкова і ґрафічна управа: АРК в СР