9. 10. 2023: В Клокочові праздновали Покровительку Земпліна

Уж по другый раз в календарї Ґрекокатолицькой церькви на Словакії припоминав ся праздник з назвов Память чудотворной Клокочівской іконы Пресвятой Богородіцї, Покровителькы Земпліна.

З той нагоды в недїлю, 8-го октобра 2023-го року, одбыв ся у тім стародавнім маріяньскім путницькім місцї на нижнїм Земплінї єпархіалный одпуст Кошіцькой єпархії. Інформовав о тім Пресовый центер Кошіцькой єпархії. Праздник є присвяченый чудотворній іконї, котра перед веце як 350-ма роками слызыла.

Участный єпарха і емеріта

Перед торжественнов літурґіёв віруючі помолили ся ружанець і Акафіст ку Пресвятій Богородіцї. Архієрейску літурґію одправляв архієпіскоп Кіріл Василь, кошіцькый єпарха, котрый мав і проповідь, а вєдно з ним служыв кошіцькый ємерітный єпарха владыка Мілан Хаутур, як і далшы священици а діаконы.

В рамках літурґії владыка Кіріл удїлив званя протоєрея і право носити набедерник і золотый крест отцёви Петрови Чінталови, містному парохови, за ёго роботу у розвитку путницького місця і реалізацію Путницького дому в Клокочові, котрый в половинї септембра того року посвятив ватіканськый державный секретарь кардінал Піетро Паролін, якый пришов на навщіву Клокочова, жебы оддати почливость і поклонити ся Клокочівскій Богородіцї.

По літурґії наслїдовав іщі Молебен ку Клокочівскій іконї, котрый одправляв емерітный єпарха Мілан Хаутур.

Праздник Покровителькы Земпліна

Праздник Покровителькы Земпліна быв установленый Декретом Конґреґації про восточны церькви (днесь Дікастерія про восточны церькви), котрый быв выданый у Ватіканї 21-го децембра 2020-го року. Стало ся так на основі жадости втогдышнёго митрополіты Пряшівской метрополії sui iuris архієпіскопа Йоана Бабяка і Рады єрархів Пряшівской митрополії, при нагоді 350-ой річніцї слызіня Клокочівской іконы.

Зробили так підпорены жадостями пріматорів і містьскых заступительств вышнёго і нижнёго Земпліна, як і підпорныма писмами Монс. Бернарда Бобера, кошіцького римокатолицького архієпіскопа-митрополіты, і владыкы Ґеорґія Страньского, православного архієпіскопа михалівско-кошіцького.

Дектрет становив, же новый праздник ся буде каждый рік святковати першу недїлю місяця октобер. В припадї, же на першу октоброву недїлю припаде 1-ый октобер, што є праздник Покровы Пресвятой Богородіцї, як тому было і тот рік, Клокочівска ікона буде праздновати ся слїдуючой недїлї – другой в октобрї.

Клокочівску ікону Папа римскый Франціск 14-го септембра 2021-го року, по архієрейскій Літурґії св. Йоана Златоустого, котрой быв головным служытелём в Пряшові, торжественно коруновав.

Петро МЕДВІДЬ, ЛЕМ.фм, языкова і ґрафічна управа: АРК в СР