9. 12. 2021: Ден Русинів в любіньскым Кружку Стоваришыня Лемків

Спомнули на бл. п. Павла Стефановского.

5. грудня/децембра 2021 р. святкуваня Дня Русинів в Польщы проходили заєдно на нашій рідній Лемковині, але тіж на землях выгнаня. І як раз на чужыні єден з локальных кружків Стоваришыня Лемків зорґанізувал своі святкуваня.

Спомнути фльориньскє віче зышли ся члены Кружка СЛ в Любіні. З той нагоды зрыхтували своі святкуваня. Не были то лем святкуваня повязаны зо споминами ци гостином. Любіньскє одділіня зрыхтувало специяльне звукове награня, якым поділили ся і з нашым радийом.

Як інформує ведучый Кружка СЛ в Любіні Павел Стафиняк, в тот ден одбыло ся засіданя членів, якє было посвячене святкуваню Дня Русинів. «На тым зобраню награли сме проґрам зо святкуваня з музичным підкладом і чытаньом вершы бл. п. Павла Стефановского» – дополнят.

Награня было передане Стоваришыню «Руска Бурса» в Ґорлицях в ціли схоснуваня в радию ЛЕМ.фм. Было оно выемітуване 7. грудня/децембра вчас авдициі «Три світы».

Любіньскы Лемкы спомянули на Павла Стефановского (1932-2021), выдатного діяча лемківской культуры, писменника, журналисту, етноґрафа і політика. Минутом тишы вшанували памят на Покійного.

Пак члены Кружка деклямували вершы Стефановского під наголовком «Ци помнеш Лемку», «Таємниця покою» і «Любителям лемківской культуры». В награню чуєте голос декляматорів: Йоана Квокы, Дариі Ткачык і Петра Федощака.

Не были то першы святкуван нацийонального свята Лемків орґанізуваны любіньскым одділіньом. Влони Ден Русинів был упамятненый молитвом за бл. п. Богдана Ґамбаля (1965-2020).

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньскіого языка.)