9. 12. 2021: КВІ Бескіды спустив сайт з датабазов присвяченов дїям І. світовой войны

Як інформовав Клуб воєньской історії Бескіды, з підпоров Пряшівского самосправного краю подарило ся му зреалізовати вебсайт, котрый обсягує датабазу місць і дїй повязаных з Першов світовов войнов.

„Пригранічны окресы днешнёго Пряшівского самосправного краю представлюють єдину область на Словакії, де почас Першой світовой войны проходили прямы бої. Лінія фронты в Карпатах притім ішла од Бардеёва по Снину,“ пише в короткій інформацї клуб.

„Почас семох місяцїв – од новембра 1914-го до мая 1915-го року, тота теріторія стала боёвов теріторіёв цїлоевропского значіня з вызначныма стратеґічныма наслїдками на далше проходжіня войны на выходній фронтї. Тутешнї боёвы операції выжадали собі жывоты понад 50 тісяч вояків австро-угорьской, російской і нїмецькой армады, далшых може 250 тісяч вояків было зраненых або дістали ся до заятя.“

Як Клуб воєньской історії далше написав, доднесь в реґіонї северовыходной Словакії сохранило ся веце воєньско-історічных памяток. Найзнамішыма суть войновы цінтерї, сохранили ся і різны памятникы, історічны будинкы або обєкты, котры суть повязаны з даным періодом.

„Вдяка підпорї Пряшівского самосправного краю подарило ся зреалізовати вебсайтову датабазу, котра на єднім місцї презентує місця повязаны з дїями Першой світовой войны.“

Новый сайт, котрый є на адресї www.ww1.sk, обсягує основны інформації о тых локалітах, як і мапу. Навщівник реґіону собі так може допереду зробити план свого путованя по памятках конфлікту з років 1914 аж 1915.

Клуб воєньской історії Бескіды підкреслив, же даны в датабазї ся доповнюють о далшы інтересны місця, як і о новы фотоґрафії ці інформації. Сайт має моментално словацьку і анґліцьку верзію.

Петро МЕШДЕВІДЬ, ЛЕМ.фм. Ґрафічна і языкова управа: ред. АРК в СР.