9. 3. 2018: 46. научный семінар карпаторусиністікы
Свій реферат на 46. Меджінароднім научнім семінарів карпаторусіністікы прочітала Мґр. Івана Сливкова, ПгД.
Главны протаґоністы 46. семінара карпаторусиністікы: (злїва) Мґр. І. Сливкова, ПгД., ПгДр. К. Копорова, ПгД., і Мґр. М. Голубкова.
28. фебруара ся в просторах Ректорату Пряшівской універзіты одбыв 46. научный семінар карпаторусиністікы. Семінар быв присвяченый літературній темі. За аналізу творів Штефана Сухого ся взяла Мґр. Івана Сливкова, ПгД., з Катедры україністікы і середнёевропскых штудій Філозофічной фалкулты Пряшівской універзіты в Пряшові. Лекція несла назву Културна ідентіта Русинів у творах Штефана Сухого. В лекції Сливкова зосумарізовала характер творів Штефана Сухого, причім основу лекції творило друге выданя книжкы гуморістічных повідань Як Руснакы релаксують. Авторка у своїй штудії зосередила позорность на выкреслїня автором стереотіпу Русина як з погляду героїв – Русинів, так з погляду героїв – Нерусинів.
Івана Сливкова є одборнов асістентков і ведучов Катедры середнёевропскых штудій на Інштітутї україністікы і середнёевропсых штудій Філозофічной факулты. Замірює ся на славяньску літературну комапратістіку, умелецькый переклад із замірянём на білоруськый язык. Є авторков і співавторков дакількох учебників, словників і іншых одборных публікацій. Од року 2014 є председкынёв комісії Літературного фонду на удїлёваня Премії А. Павловіча за найлїпшый літературный твір в русиньскім языку.
Сучастёв семінара карпаторусиністікы была і презентація найновшых публікацій. Шпеціфіков семінарів, котры суть уж дакілько років орґанізованы зачатком рока на тему русиньской літературы, бывать ай автоґраміада нововыданых белетрістічных творів. Так то было ай на першім тогорічнім семінарї. Меджі презентованыма была і книжка Штефана Сухого: Як Руснакы релаксують. Автор, на жаль, з особных прічін на автоґраміадї не быв притомный, хоць многы участникы семінара ся надїяли, же дістануть книжку ай з присвячінём од Штефана Сухого.
На презентації были представлены і далшы публікації красной літературы, котры вышли в роцї 2017 в рамках проєктів Уряду влады, проґраму Култура народностных меншын – книжка кресленого гумору Хто ся сміє, є одважный, автора Міра Жолобаніча і книжка про дїти Дякую, мамко автора Юрка Харитуна, але ай іншы публікації, котры вышли од послїднёго семінара і дотыкають ся ці то карпаторусиністікы як научной дісціпліны, або карпатьскых Русинів, жыючіх в сучасности в розлічных штатах Европы, але ай у світї.
Мґр. Зденка Цітрякова,
інтерна докторандка Інштітуту русиньского языка і културы ПУ.
