9. 4. 2024: В Лютинї буде выстава фотоґрафій із навщівы Папы Франціска на Словакії

Як інформовала Пряшівска ґрекокатолицька архієпархія, в стародавнім путницькім місцї ґрекокатоликів – в Лютинї, буде одкрыта выстава фотоґрафій із навщівы Святішого Отця Франціска на Словакії.

Выставу орґанізує містна парохія вєдно із Обществом хрістіансьскых фотоґрафів Чоловік і Віра. Їй святочне одкрытя одбуде ся в неділю, 14-го апріля 2024-го року, і буде єй мож посмотрити в просторах Ґалерії Мікулаша Климчака до 25-го мая.

В день одкрытя выставы в лютиньскій базиліцї кір Йона Максим, пряшівскый архієпіскоп і митрополіта одслужыть архієрейску літурґію, по котрой скінчіню буде участный і на вернісажи в ґалерії, котра стоїть в путницькім ареалї коло базилікы.

Понад 60 фотоґрафій

Выставу творить 66 великоформатовых фотоґрафій, котры документують найважнїшы моменты з навщівы Папы Франціска на Словакії у 2021-ім роцї. На выставі бере участь тринадцять членів общества фотоґрафів, котры документовали нелем навщіву, але і супроводный проґрам, приправы і роботу добровольників, як і дяковну путь віруючіх із Словакії у Ватіканї.

Як пишуть орґанізаторы, Общество хрістіаньскых фотоґрафів Чоловік і Віра має своє походжіня в Чеській републіцї, де выникло у 2011-ім роцї. За куртый період кількость членів значно наросла і общество почало дїяти і в далшых країнах як Польща, Мадярьско, Еґіпт а Словакія, де є моментално 30 членів.

Покровительство над выставов перевзяв кошіцькый римокатолицькый архієпіскоп і митрополіта Бернард Бобер, котрый є єдночасно председом Конференції єпіскопів Словакії. Выстава пізнїше попутує до Дому святой Єлизаветы у Кошіцях, Спішской Капітулы, Шаштїна і наконець буде выстава приступна в Катедралі святого Мартіна в Братїславі.

Папа одслужыв меджі ґрекокатоликами літурґію

Папа римскый Франціск почас своёй навщівы в септембрї 2021-го року навщівив і Пряшів, де ся стрїтив із ґрекокатолицькыма віруючіма. До Пряшова пришов 14-го септембра, коли в літурґічнім календарї маєме праздник Воздвиженія Честного Креста.

Веселеньскый Архієрей історічно в містї, в котрім має свій центер Ґрекокатолицька митрополітна церьков на Словакії, быв головным служытелём літурґії у восточнім обрядї, а так само мав і проповідь.

Быв то другый Папа римскый, котрый пришов до Пряшова меджі ґрекокатоликів. Першым быв Йоан Павел ІІ., котрый навщівив тото місто в роцї 1995. Молив ся втогды і в Ґрекокатолицькім катедралнім соборі святого Йоана Крестителя на гробі русиньского єпіскопа, священомученика Павла Петра Ґойдіча, якого о шість років пізнїше выголосив у Ватіканї за блаженого.

Петро МЕДВІДЬ, ЛЕМ.фм, языкова і ґрафічна управа: АРК в СР