9. 5. 2022: В Пряшові быв інтронізованый новый апостольскый адміністратор

В недїлю, 8-го мая 2022-го року, быв Катедралнім соборї святого Йоана Крестителя в Пряшові інтронізованый до уряду апостольского адміністратора sede vacante Пряшівской архієпархії владыка Петро Руснак, братїславскый єпарха.

Як інформовав говорця Пряшівской ґрекокатолицькой архієпархії Михал Павлишіновіч, на початку торжественной події Монс. Андрій Євчук, шарже д-аффер (chargé d’affaires) Апостольской нунціатуры на Словакії прочітав декрет Конґреґації про восточны церькви в Римі.

В нїм ся пише: „Кедьже про канонічне зречіня ся єпіскопскых обовязків Його Ексцеленції Йоана Бабяка, подля припису канона 210 Кодексу канонів восточных церьквей Пряшівска метрополітна архієпархія стала вакантнов, Його Святішість Папа Франціск 25-го дня місяця марец 2022-го року до спомянутой архієпархії ласкаво послав і рачів выменовати їй апостольскым адміністратором sede vacante Його Ексцеленцію Петра Руснака, єпіскопа Братїславской єпархії візантійского обряду, вєдно із вшыткыма правами і обовязками, котры повязаны з тым урядом.“

Зречіня ся уряду пряшівского архієпіскопа і метрополіты Йоана Бабяка Папа римскый Франціск прияв 25-го апріля 2022-го року. Владыка Петро Руснак (на фоітцї) зіставать єпархіалным єпіскопом Братїславсой єпархії, і вєдно з тым буде рядити Пряшівску архієпархію як апостольскый адміністратор.

Главным служытелём торжественной літурґії быв новый апостольскый адміністратор, котрый і проповідав. Вєдно з ним служыли владыка Йоан Бабяк, владыка Маріян Андрій Пацак, Монс. Андрій Євчук, за Кошіцьку єпархію быв участный архімандріта Ярослав Лайчіак і приблизно тридцять священиків Пряшівской архієпархії.

На кінцю літурґії подяковав владыкови Йоанови Бабякови за 19 років єпіскопской службы отець Любомір Петрик, делеґат ad omnia Пряшівской архієпархії. Делеґат ad omnia подля церьковного права є выменованый апостольскым адміністратором,  і є другым штатутарём єпархії. Має выконны права.

У своїм дяковнім приговорї підкреслив безпрестайну службу владыкы Бабяка, через котру „Бог підняв Ґрекокатолицьку церьков, што было уміцнене і минулорічнов Святов літурґіёв, котру служыв у Пряшові Папа римскый Франціск почас своёй апостольской навщівы на Словакії.“

Петро МЕДВІДЬ, ЛЕМ.фм. Ґрафічна і языкова управа: ред. АРК в СР