9. 5. 2022: Медайлу презідента Словацькой републікы дістала Марька Мачошкова

Презідентка оцїнила першу даму русиньской співанкы.

Презідентка Словацькой републікы удїлила в недїлю, 8-го мая 2022-го року, в будові Словацькой філгармонії в Братїславі державны нагороды 25-ём особностям сполоченьского, културного і шпортового жывота. Шість з того in memoriam.

Державны нагороды вручали ся з нагоды 29-ой річніцї выникнутя Словацькой републікы, но і тот рік не могла церемонія проходити в януаровім термінї з пирчіны пандемічной сітуації.

Меджі оцїненыма особностями є і Марія Мачошкова, перша дама русиньской народной співанкы. Презідентка нашу Марьку Мачошкову оцїнила Медайлов презідента Словацькой републікы за вызначны заслугы о розвиток Словацькой републікы в области културы.

Марька Мачошкова

Народила ся Марія Мачошкова 30-го марца 1940-го року в русиньскім селї Потічкы, в окресї Стропків. Належыть ку найвызначнїшым особностям културного жывота Русинів на Словакії. Нихто їй не повість іншак, як Марька.

Выростала в нелегкых войновых і повойновых роках. Любов ку співу чула уж од дїтинства, і то, як соминать, вдяка своїй мамі, котра мала красный голос. Пак їй талент підхопили в школї.

Як молоде дївча у 1956-ім по конкурзї наступила до новооснованого Піддуляньского україньского народного ансамблю (днесь Піддукляньскый умелецькый людовый субор), котрый быв втогды балетом і оперетов Україньского націоналного театру (днесь русиньскый Театер Александра Духновіча). В ансамблї співала 42 років.

З тым умелецькым тїлесом перешла часть світа, абсолвовала стовкы выступлїнь. Їй спів, їй презентація нашого фолклору могла публіка відїти на сценах од Тунісу через Голандію, Данію, Нїмецько аж по Споєны штаты Америкы, Канаду і бывшый Совєтьскый союз.

У 1985-ім роцї здобыла тітул Залуженый умелець. Зробила велике множество награнь, включно профіловых албумів, сполупрацовала і з іншыма тїлесами, наприклад з Бырняньскым радіовым орхестром народных інштрументів – BROLN.

Хоць стала успішнов і знамов співачков, Марька Мачошкова цїлый жывот зістала скромным і покорным, а главно добрым чоловіком. При споминах на своє дїтинство бісїдує, же біда і їджіня з єдной мискы вєдно із сородинцями єй выховали ку скромности і сполуналежности.

Потїшуючім фактом є, же у Марькы Мачошковой вік не грає жадну роль. Актівна є доднесь, мож єй відїти на різных културных подіях, фестівалах, де все потїшыть публіку. Хоць остатнї два рокы такым подіям барз не жычіли, уж теперь рихтує Марька Мачошкова концерты, котры мали одбыти ся іщі перед двома роками ку їй жывотному юбілєю.

Медайла презідента Словацькой републікы

Медайла Людовіта Штура ІІ. ступня, яку Марька дістала, є єднов із державных нагород Словацькой републікы.

Удїлює ся обчанам Словацькой републікы, котры ся вызначно заслужыли о ряджіня і справованя державы, о розвиток в области обраны і безпечности Словацькой републікы, господарьства Словацькой републікы, теріторіалной самосправы, наукы і технікы, културы, уменя, шпорту і в соціалній области або за вызначне пошырёваня доброго мена Словацькой републікы.

Належыть і тым, котры з насаджінём властного жывота заслужыли ся о уратованя людьского жывота або уратованя значных матеріалных цїнностей. Вынятково удїлює ся і обчанам іншых держав.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР