9. 6. 2021: Мадярьскы озброєны силы веде ґенералмаёр русиньского походжіня

В суботу, 5-го юна 2021-го року, в будапештяньскім парламентї перевзяв командованя Мадярьскых озброєных сил ґенералмаёр Ромулус Русин-Сенді. Рішінём мадярьского презідента Яноша Адера быв на тоту посаду призначеный од 3-го юна до 31-го мая 2026-го року. Інформовала о тім аґентура MTI.

Новый головный командант Мадярьскых озброєных сил ся народив 5-го мая 1973-го року в Мішковцї, є доктором воєнськых наук. Як вже назначує і ёго призвіско, має русиньске походжіня.

Кедь в децембрї 2019-го року мадярьскы Русины зышли ся у каштелю Штефанія, што находить ся в Будапештї, на події під назвов Шедевры Русинського Умілства, на події быв участный і Ромулус Русин-Сенді. В тім часї быв бріґадным ґенералом, ведучім секретаріату Міністерства обороны МР.

В статї, котра пак на тоту тему вышла в часописї Русинськый світ – Ruszin Világ, чітаме, же днесь вже главный велитель Мадярьскых озброєных сил має русиньске походжіня, ку чому ся він голосить, і ёго родічі жыють в Еделейню, малім містечку в Боршодьско-абовско-земпліньскій жупі, лем пів годины драгы од Мішколвця.

Мадярьскы медії вже кінцём мая інформовали, же презідент Янош Адер одкликав главного команданта Мадярьскых озброєных сил Ференца Корома. Міністер обороны Тібор Бенко запроновав за нового команданта ґенералмаёра якраз Ромулуса Русин-Сендія.

На святочній події, котра в суботу проходила в Купольній салї парламенту, окрем іншых, брали участь Янош Адер, председа влады Віктор Орбан, председа парламенту Ласло Кевер ці дакілько бывшых начальників штабів.

Петро МЕДВІДЬ, ЛЕМ.фм, ґрафічна і языкова управа: ред. АРК в СР, жрідло фотоґрафії: napi.hu.