9. 8. 2023: Зачнуть реконштрукчны роботы на далшій части Любовняньского замку

Роботы на реконштрукції далшой части Любовняньского замку зачнуть приблизно о місяць. Як про аґентуру TASR потвердив директор Любовняньского музея Далібор Микулик, зготовителёви буде ставба передана 5-го септембра 2023-го року, роботы бы мали быти закінчены до 18-ох місяцїв.

Цілковый кельчік на реконштрукчны роботы є 1,2 міліона евр, з чого 650 тісяч пришло як дотація з Міністерства културы Словацькой републікы, решту зафінанцує Пряшівскый самосправный край, котрый є зряджователём музея.

Зачати хотять штонайскорíше

„Зачінаме далшу велику і складну реконштрукцію замку, тотраз іде о северовыходну стїну, впаджену охоронну стїну замку, плус цїлый третїй двір. Частёв проєкту є і презентація археолоґічной локаліты воєньскых касарень, часть застрїшіня і одводнїня цїлого третёго двора,“ інформовав Микулик.

Подля директора музея є цїлём зачати муровати штонайскорїше, жебы было доста часу на реалізацію робот іщі перед тым, як прийде мороз.

„Не мурує ся на замках, кедь ночна теплота знижыть ся під мінус пять ґрадусів, вірю, же почас осени зробить ся фалат роботы. Дотеперь сьме при реконштруцкії трёх палаців замку все сприступнили тоту часть замку, котра ся не обновлёвала, а іншак то не буде ани теперь. Неприступный буде лем третїй двір, де того часу проходять выступлїня соколярів, тоты перенесуть ся на другый двір. Остатнї части замку будуть приступны,“ звернув увагу директор музея.

Іде о складну реконштрукцію

Микулик підкреслив, же обнова буде дуже складна, кедьже впаджену охоронну стїну замку треба поставити наново і забезпечіти статіку стїны.

Навеце, при будованю стїны мусять мерьковати, жебы не порушыли археолоґічну локаліту історічных касарень із 17-го столїтя. Тоты были обявлены у 2011-ім роцї, кедь часть северовыходной стїны впала.

„Може при реконштрукчных роботах обявить ся і штось нове і розкрыє ся далшый кусок історії замку, подобно, як то было при палаці Любомірьскых. При ёго обнові обявили сьме наприклад тоалету і чорну кухню,“ додав Микулик.

За словами директора в половинї лїтнёй турістічной сезоны суть з навщівностёв вынятково спокійны. Затля реґіструють нароснутя чісла турістів о 30 процент в порівнаню з єднакым періодом в минувшім роцї.

Петро МЕДВІДЬ, ЛЕМ.фм, языкова і ґрафічна управа: АРК в СР.