9. 9. 2022: В Меджілабірцях одкрыли деревяну пластіку Духновіча
5-ый септембер 2022-го року быв на Словакії першым днём в новім школьскім роцї. Основна школа Духновічова в Меджілабірцях го зачала торжественно. В ареалї школы была одкрыта деревяна пластіка Александра Духновіча з двома школярями.
Пластіку русиньского будителя, котрой автором є академічный скулптор Юрай Чутек, подаровала місту Меджілабірцї Фундація деревяна церковця Габура.
Фундація тот рік орґанізовала в Габурї вже 4-ый рочник Скулпторского сімпозія Олены Мандіч-Шіналі, на котрім брало участь десять скулпторів із Словакії а Чеськой републікы. Пластіка Юрая Чутека выникла якраз почас сімпозія, котрый почав 23-го авґуста і закончів ся 5-го септембра 2022.
На торжественнім одкрытю за участи школярів Духновічовой школы были присутны і далшы гостї. Подію приговором одкрыв директор школы Іван Штефанко. За Фундацію деревяна церьковця Габура приговорив ся Душан Завацькый, місто репрезентовав пріматор Владислав Вышньовскый.
Пріматор дїтям припомянув, же памятать часы, коли Русины не годны были голосити ся ку своїй народности, наперек тому, же добрї познали слова Духновічово стиху Вручаніє. За словами пріматора і тота скулптура має быти потверджінём, же Меджілабірцї суть русиньске місто і жыють в нїм Русины, котры уж днесь можуть ся слободно голосити ку свому походжіню.
На події брав участь і ґрекокатолицькый парох із Олькы, отець Мілан Ясик, котрый є бывшый школярь той школы. Пластіку отець Ясик посвятив. За Русиньску оброду на Словеньску приговорив ся Володимір Противняк.
О авторови
Академічный скулптор Юрай Чутек (р. 1957) є родаком із Жіліны. Выштудовав Середню умелецько-промыслову школу в Братїславі, пак академічный тітул здобыв на Высокій школї умелецько-промысловій у Празї, де штудовав у професора Малеёвского і у професора Свободы.
Замимать ся переважно коморнов і монументалнов пластіков, творїнём інтерьєрів, так само рисує і малює. Свої творы выставлёвав на Словакії, в Чеській републіцї, Швейцарії, Голандії, Нїмецьку, Франції, Італії і Ізраілю. Належыть ку найоріґіналнішым словацькым вытварникам своёй ґенерації.
Петро МЕДВІДЬ, ЛЕМ.фм. Фото: FB / Місто Меджілабірцї.
