9. 9. 2022: Юрко ХАРИТУН: Мушля, Ква ква ква, Любов (Стихы)

Юрко Харитун

МУШЛЯ

Хтось на ухо мушлю кладе

і чує море

А хтось нашу рїку

яка гучіть і тече долинов

аж сердце поре

Ани море ани рїка

то кров так тече

у нашім тїлї по жылах

Прикладую мушлю на ухо

не знаю што чую

але даю ся до писаня

Значіть, же іщі жыю я

Дякую тобі, мушля моя

 

 

КВА КВА КВА

(Вірш написаный із внучков Зузков.)

Боцан має довгы лабкы

і довгый дзёбак

А він ловить в млачцї жабкы

і не має страх

Одсудили боцана

Ква ква ква

І він може мати млачку

у якій не буде жаб

Боцан нашов таке місце

хто бы то повів

А теперь там видно

аж трёх боцанів

Каждый вечур

ква ква ква

чути концерт жаб

Што ся стало же так тихо

же не чути ква ква ква

Умерають нашы жабкы

під колесами авт

Поможме їм і мы

перейти через дорогу

до рїкы скочать самы

Така природа

такы законы

А яка краса

Жабкы найдуть собі млачкы

Боцаны гнїзда

 

 

ЛЮБОВ

Я буду мотылём

а ты квіточков моёв

Я буду потічком

а ты рїков

Любов

будь менї тїлом

а я тобі душов

На світї

не є жытя без любві

Будь моя

я буду твій

Так каже поезія менї

 

(З приправлёваной книжкы Юрка Харитуна – Мої пішникы.)