9. 9. 2023: Плоды властной роботы

За пару років то можуть „Русины-Українці“ заперти.

Резултаты списованя жытелїв на Словакії із 2021-го року через оптіку того, ці особы приголошены ку меншынї суть і обчанами Словацькой републікы, прінціпіално в дакотрых припадах мінять чісла. А єдночасно потверджують, же робота русиньскых орґанізацій не є даремна.

Што говорять резултаты із списованя, кедь ся посмотриме на детайл, ці ку меншынї приголошены особы суть і словацькыма обчанами?

Ку Русинам приголосило ся в 2021-ім роцї 63 556 людей, з котрых 63 270 особ має словацьке обчанство. З того нам выходить, же 99,5 процента приголошеных Русинів є домашнїх Русинів, обчанів Словацькой републікы. Што то значіть?

За тыма чіслами ся крыє омного веце важных фактів, як ся на першый погляд може відїти. Самособов, все буде діскусія о тім, чом веце людей приголосило ся ку русиньскій народности аж в другім вопросї, а не в першім. Все буде діскусія о тім, якы бы были нашы резултаты, кебы списованя ішло за старов сістемов, лем з єдным вопросом на народность. Але важнїше є дашто інше.

Важнїшым є факт, же 63 270 людей є словацькых обчанів. Тото ясно вказує, же возродна робота русиньскых орґанізацій, котра почала перед веце як 30 роками, запустила своє корїня меджі людми.

Ідея русинства, ідея вернути ся ку свому походжіню, по десятках років неєствованя, асімілації, українізації, перемогла, і словацькы обчане русиньского походжіня то дотеперь каждым списованём од 1991-го року потвердили высшым чіслом декларованых Русинів.

Важнїшым є факт, же 63 270 словацькых обчанів є якраз тот метер, котрым має ся односити держава ку Русинам.

Бо тото чісло має на далшых десять років быти алфов і омеґов, кедь будеме бавити ся о часовых дотаціях в народностнім высыланю верейноправного телерадія про Русинів, кедь будеме ся бавити о заступлїню Русинів у даякых радах, выборах, комісіях, а тото чісло уж і реално стало крітеріём того, в кілько селах і містах русиньскый язык став од марца 2022-го року урядным языком.

6 227 Українцїв, обчанів Словацькой републікы має быти тым самым параметром, што у Русинів 63 270, подля котрого будуть сягати на высоту своїх прав.

Є мілым бонусом, же ся нашли люд, котры почас списованя мали офіціалне перебываня на теріторії Словацькой републікы, і як обчане іншой державы приголосили ся ку Русинам, што нам зробило тых 63 556 людей. Ту знова треба припомянути, же русиньскы орґанізації бы мали задумати ся над тым, яку „пасторацію“ робити, жебы тых людей підхопити, жебы їх зачленити до нашых комуніт, і жебы нам тоты люде не пропали, кедь дакотры з них по часї будуть жадати, і дістануть словацьке обчанство.

Але важным є факт, же 99,5 процента тых, котры ку Русинам на Словакії приголосили ся, суть словацькы обчане, бо якраз тым словацька конштітуція і далша леґіслатіва ґарантує народностны права, і якраз тых 99,5 процента буде тым параметром, котрый бы нам мав дати точный резултат, як высоко аж з нашыма правами можеме іти.

Резултат, котрый Русины досягли, суть плоды властной роботы. Роботы трёх декад, роботы множества людей, орґанізацій, котры то не робили, і не роблять про ніч інше, лем про тото, же люблять і честують заповідь своїх предків і свій народ.

Плоды властной роботы позберали і Українцї, або лїпше повіджено „Русины-Українцї“ на Словакії.

Велика слава коло того, же першый раз од 1991-го року наросли, бо все з чіслами ішли лем долов, не є уж аж така крішталово чіста, кедь возьмеме факт, же з 11 037 особ приголошеных ку Українцям є лем 6 227 обчанів Словацькой републікы.

Такзваны „Русины-Українцї“ тых самых веце як 30 років, коли Русины робили на ниві возроджіня, знали лем стрїляти до Русинів, атаковати їх, спохыбнёвати, паразітовати на них своїма українізачныма подїями, а не плекали жадну україньску културу. Як бы і могли, кедь они самы з досправдовов україньсков културов ани ніч довєдна не мають?

6 227 гражданів Словацькой републікы має быти тым самым параметром, што у Русинів 63 270, подля котрого будуть сягати на высоту своїх прав. Ледво дістали ся над 50 процент, а о десять років то уж може буде під 50 процент з цїлкового чісла.

Тот факт ясно говорить о тім, же за пару років то можуть „Русины-Українцї“ заперти. А тых пару років, покля досправды не стануть Українцями, лем далше будуть українізаторами, будуть уж лем доїдати плоды своёй роботы. Склеп ся предсі заперать аж порожнїй.

Петро МЕДВІДЬ. Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.

Ґрафічна і языкова управа: АРК в СР.