30. 8. 2017: Оцїнили владыку Мілана Хаутура

Жупны посланецї Кошыцького самосправого краю 21-го авґуста 2017-го року на своїм засїіданю вырїшыли, котры особности і колектівы дістануть Ціну Кошыцького самосправного краю (КСК) за рік 2017.

Міджі оцїненыма є і ґрекокатолицькый єпарха Кошыцькой ґрекокатолицькой єпархії владыка Мілан Хаутур. Цїну КСК кошыцькый єпарха здобыв із нагоды ёго 60-ых народенин і за вызначный вклад при будованю екуменізму в Кошыцькім краї, актівности при роботї з молодежов і соціално слабшыма ґрупами жытелїв, як і за рішучій вклад коло зачленїня Кошыцькой єпархії до духовного і сполоченьского жывота краю.

 

Мілан Хаутур

Владыка Мілан Хаутур народив 4-го септембра 1957-го року в Снинї. Дітинство пережыв в малім русиньскім селї Велика Поляна, котре днесь вже не існує. Село было жертвов будованя водного резервоару Старина.

Владыка штудовав на ґімназії в Гуменнім, пак быв в роцї 1976 приятый на Кірілометодійску богословску факулту в Братїславі. В тім часї ґрекокатолици не могли мати властну семінарію, і так каждый рік державов встановлене мале чісло богословів могло іти штудовати на римокатолицьку факулту в Братїславі. Два рокы перед штудіом в Братїславі тайно вступив ку ґрекокатолицькым редемпторістам своїма першыма обітами. Вічны обіты мав владыка Мілан тайно о шість років пізнїше. На священика быв рукоположеный в роцї 1981. В роках 1982 аж 1984 абсолвовав повинну основну воєньску службу і пак зачав выконовати душпастырьске діяльство.

В роках 1984 аж 1985 быв у парохії в Міджілабірцях, де ся му подарило забезпечіти будову фары. Про свою актівну роботу з молодежов, штос ся не любило комуністічным влластям, быв переложеный до Шмиґовця, села далеко од центру діяня. І в тій парохії, у котрій быв у роках 1985 аж 1989, зробив барз много хосенной роботы в навколишнїх дванадцятёх русиньскых селах. Од юлія 1989-го року быв післаный до Порубкы і єдночасно выпомагав у Гуменнім. О рік пінзнїше став ся протоіґуменом – віцепровінціалом Конґреґації редемпторістів з резіденціов у Михалівцях.

11-го януара 1992-го року папа римскый Йоан Павел ІІ. выменовав Мілана Хаутура за владыку помічника Пряшівской ґрекокатолицькой єпархії. Рукоположеный на єпіскопа быв руками втогдышнёго пряшівского єпархы – владыкы Йоана Гіркы 29-го фебруара 1992-го року. 21-го фебруара 1997-го року быв тым самым папом римскым выменованый за першого екзарху нововыникнутого Кошіцького ґрекокатолицького екзархату з центром в Кошіцях. О єденадцять років пізнїше, в рамках реорґанізації церьковного веджіня на теріторії Словакії, быв владыка Мілан Хаутур 30-го януара 2008-го року папом римскым менованый за кошіцького єпарху. В тім самім часї, коли єкзархат быв повышеный на єпархію, єпархія в Пряшові стала ся архієпархіов і нова єпархія выникла в Братїславі, чім на Словакії выникла метрополітна церьков.

П. М.